Республикым вуйлатыше Йошкар-Оласе «Водоканал» предприятийыш миен

Республикым вуйлатыше Александр Евстифеев Йошкар-Олаште йӱшаш вӱдым ситарыше «Водоканал» предприятийыш миен. «Водоканал» шке историйжым 1937-ше ий гычак тӱналын. Тунам икымше вӱд пучым да Изи Какшан гыч вӱдым налше станцийым пашаш колтымо. А кызыт тудо илаш полшышо тӱн объект манаш лиеш. Тудын дене олан вияҥмыже кылдалтын. Республикым вуйлатыше 436 меҥге кужыт вӱд пучым да 370 меҥге кужыт канализаций сетьым обслуживатлыше предприятийын куатшым ончен, пашаче коллектив дене мутланен, вуйлатыше- влак дене сетьым уэмдыме йодышым каҥашен. Пытартыш кок ийыште ола воктелсе ял-влакым ушен шогышо пуч- влакым чоҥымо. Директорын сомылжым шуктышо Александр Синяевын мутшо почеш технике уэмеш, олмыктымо паша шукталтеш, но сетьым ятыр ий пужен ыштыме огыл. Тудо 60 утла процентлан тоштемын. Республикым вуйлатыше палемден: сетьым пужен ыштыме сомыл пеш пӱсын шога, тудо правительстве кӱкшытыштӧ каҥашалтеш. Йошкар-Олаштат, Волжскыштат олмыктыман. Волжскышто проектно-сметный документаций ямде. Сетьым вашталташ ик миллиард теҥге окса кӱлеш. Сетьлан кӧра ме сай качестван, яндар вӱдын 40 процентшым йомдарена. Мутланымаште тыгак «Водоканалыште» тыршыше- влакын пашадарыштым кӱзыктымӧ нергенат ойлымо. Предприятийын вуйлатышыштлан ончыкыжым вияҥме концепцийым ямдылаш темлымашым пуымо. Кызыт моло кундемлаште вӱдым ситарыме системым пужен ыштыме йодышым виктарен колтымым шымлена,- каласен Александр Евстифеев.