Шушаш ийын республикысе перинатал рӱдерым чоҥаш тӱҥалыт

Федераций Советым вуйлатыше Валентина Матвиенко Марий Элым вуйлатыше Александр Евстифеев дене вашлийын. Нуно республикым социально- экономически вияҥдыме йодышым каҥашеныт. Матвиенко республикым вуйлатышым Йошкар-Ола гыч Москошко самолёт чоҥештылаш тӱналме дене саламлен. Тиде проектым шыҥдараш чот тыршымыдам калык аклен манын шонем. Ынде вес кӱлешан йыжыҥже- чоҥештен кӱзымӧ да волен шичме полосам пужен ыштымашым мучашлаш кӱлеш,- каласен Федераций Советым вуйлатыше. Матвиенко тидымат палемден: республикыште перинатал рӱдерым чоҥымо пашам 2020-шо ийысе бюджетыш пуртымо. Тиде йоча шочмашым да йочан тазалыкшым аралымаште пеш кӱлешан проект. Александр Евстифеев шке велымже республикысе экономик паша нерген увертарен да Валентина Ивановналан республике деке тӱткышым ойырымылан тауштен ойлен. Вара Матвиенко республикым вуйлатышылан ончыкылык сеҥымаш- влакым тыланен да «Федераций Совет. 25 ий» шарнымашан медальым кучыктен.