Таче Йошкар-Оласе социал тӧнежлашке да илыме пӧртлашке шокшым пуаш тӱҥалме
Таче Йошкар-Оласе социал тӧнежлашке шокшым пуымо. Тиден нерген олан мэрже Евгений Маслов социал сферым да объект- влакым телылан ямдылыме йодышлан пӧлеклыме Республикым вуйлатыше Александр Евстифеевын эртарыме совещанийыште увертарен. Олам вуйлатыше ешарен: тыгай решенийым игече йӱкшемдымылан кӧра лукмо. Топливым тичмаш ситарыме. Зданий- влак 99 процентлан ямде улыт, лач ик частный виктарыше компаний гына тичмаш ямде огыл. Александр Евстифеев тыге каласен: эн тӱҥжӧ калыклан нимогай нелылык ынже лек, пачерышкышт шокшым жапыштыже пуымо лийже. Тичмаш налмаште шыже-теле жаплан ямдылалтмаш график дене келшышын шукталтеш. 99,5 процент пӧрт да 99,1 процент котельный, вӱд пуч да канализаций сеть ямде улыт. Лач Звенигово районысо Красногорский посёлкышто шуко пачеран 20 пӧртын документше ямде огыл. Республикым вуйлатыше нуным 27 сентябрь марте ыштен шукташ кӱштен. Посна йодыш семын Килемар ден Юрино районлаште топливым ситарыме пашам ончымо. Молан манаш гын, тушко газ эше миен шуын огыл. Тушкат газым пурташ ямдылалташ тӱҥалаш кӱлеш манын каласен Александр Евстифеев. Совещанийыште увертарыме: нине районлаште пеҥгыде топливым тӱрыс ситарыме. Республикыште чылаже 25 тӱжем тонн мланде шӱйым шапашлыме. Аварийный шапашлан 13 миллион теҥге оксам палемдыме. Йошкар-Олан мэрже Евгений Масловын таче пеҥгыдемдыме пунчалже дене оласе илыме пӧртлашкат таче шокшым пуаш тӱналме.