Шернур посёлкышто у автостанцийым почмо

Эртыше шуматкечын Шернур посёлкышто у автостанцийым почмо. Ынде посёлкысо калык да нунын унашт ятыр ий автобусым вучышыла тӱрлӧ нелылыкым чытымыштым монден кертыт. Кылмен, лум да йӱр йымалне нӧрен шогаш ок кӱл. Тушто вучымо зал, калык коштмо вер улыт, шокшо чайым подылаш лиеш. Водитель- влакланат посна пӧлемым ойырымо. Объектым чоҥаш ик ий наре жап каен. Вержат келшен толшо: посёлкын рӱдыштыжӧ. Ондак тудо тӱрыштӧ ыле. Калыкым тӱрлӧ велыш шупшыкташ тӱҥалыт. Кызыт Марий Турек ден Йошкар-Олаш расписаний пеҥгыдемдымаште улеш. Ончыкыжым, Киров, Вятские Поляны, эсогыл Озаҥышкат коштыкташ шонымаш уло. Маршрутыш 30 автобус лекшаш. Автовокзалым почмашке погынышо- влакым республикысе транспорт министрын сомылжым шуктышо Дмитрий Волков саламлен. Икманаш, тиде район кӱкшытан гына огыл, республике кӱкшытан событий. Молан манаш гын, кызытсе жаплан келшыше автостанций- влак социал инфраструктурышто моткоч кӱлешан ужаш улыт. А Шернурысо автовокзал кугыжаныш ден посна еҥын пырля пашам ыштымыштын сай примерже. Тудын кӱлешлыкше нерген республикым вуйлатыше Александр Евстифеев ик гана веле огыл ойлен ыле. Тыгай йӧн денак У Торъял посёлкышто кок ий ончыч у автовокзалым почмо ыле.