Йошкар-Олам йыр эртен кайыме корным «суперасфальт» дене олмыктат

Йошкар- Ола воктеч эртен кайыме корнышто кызытсе жаплан келшыше асфальтым кучылтын капитально олмыктымо паша кая. Корно пашаеҥ- влак сомылыштым чаплын шуктат да ыштыме пашашт дене калыкымат паладараш тыршат. Олмыктымо вер- влакым журналист- влаклан ончыктеныт. Паша чынжымак шолеш веле, шокшо асфальт гыч пар лектеш. Ондак асфальтын составшым ГОСТ почеш ыштеныт гын, кызытсе асфальтым ышташ эшеат нелырак. Чоҥышо- влакын мутышт почеш «Суперасфальтыш» тӱрлӧ тыгыде кӱм ешарат: состав денат, кугыт денат. Тидыже пеҥгыдылыкышым ешара маныт. Кызыт Америкыште кучылтмо гай пеҥгыде СП-19 маркан асфальтым оптат. Йошкар-Ола воктеч кайыше корнын шым меҥге кужытыштыжо паша мучашлалтеш. Тушто йымал ужашыштыже йӱштӧ регенераций йӧным кучылтыт. Ӱмбалныже саде «суперасфальтетым» шарат. Тыге корнышто колея лийшаш огыл. Асфальтым шарымеке, тудым вигак электромагнит плотномер дене тергат, тудын пеҥгыдылыкшым ончат. Тичмаш налмаште корно ятыр вере ышталтеш. Тений 32 меҥге утла кужыт федерал корным олмыктен шуктышаш улыт, тушечын пелыжым-капитально. Тений корным ачалаш да капитально олмыкташ федерал бюджет 620 миллион утла теҥге оксам ойырен.