Шкетан лӱмеш театр у тургымым почеш

Шкетан лӱмеш марий калыкле драма театрыште у тургымым почмо да театрын 100 ияш лӱмгечыжым пайремлыме шотышто пресс-конференций лийын. Лӱмгече 29-ше ноябрьыште лиеш. Пресс-конференцийын пашаштыже тӱвыра министрын алмаштышыже Михаил Матвеев участвоватлен. Театрым вуйлатыше Эрик Юзыкайнын мутшо почеш, театрын 100-шӧ тургымжо 100 ияш лӱмгече дене тӧр толын. Сандене репертуарымат келшышым чумырымо. Тургымым почмаш ойыртемалтше лийшаш. Тудо 4-ше октябрьыште почылтеш. 16 шагатат 30 минутлан ончаш толшо- влакым театрыш пурымаште вашлийыт. Вара чылалан олмыктымо да уэмдыме театр мучко экскурсийым эртарат. Фойеште модмаш, выставке, оҥай вашлиймаш- влак лийыт. А 18 шагатлан Шкетанын пьесыж почеш шындыме «Ачийжат, авийжат» спектакль тӱҥалеш. Тений Шкетан театр у спекткаль- влак дене куандара. «Шӧртньӧ лудо», «Илена-йӱлена», «Уло яллан ик Йогор», «Окса тул» да моло спектакль- влакым сценыш луктеш. Ноябрьыште Шкетан театрыште калыкле драматургийын фестивальже лиеш. Тушко Марий Эл, Татарстан, Чуваший, Калмыкий гыч театр- влак толыт. Михаил Матвеевын мутшо почеш 2020-шо ийыште республикысе чыла театрлан федерал рӱдер гыч «Изи ола- влакын театрышт» проект почеш окса полыш лиеш.  Лӱмгече идалыкыште театр тыгак Венгрий ден Эстонийыш миен толаш шона.