Озаҥ олаште ӱштӧ дене кучедалмаш дене Российын чемпионатше эртен
Озаҥ олаште 6-шо гыч 8-ше декабрь марте ӱштӧ дене кӧраш кучедалмаш дене Российын чемпионатше эртен. Тушко Российысе 30 кундем гыч 200 наре спортсмен ушнен. Марий Элысе «Олимпий резерв комплексный спорт школын» спортсменже- влак сай лектышым ончыктеныт. Нунын дене тренер Ильдус Гарипов пашам ышта. Иван Андреев 60 килограмм нелытан- влак коклаште той призёр лийын да Российын спорт мастержын норматившым шуктен. Мунир Галлямов 70 килограмм нелытан- влак коклаште да Рамис Аухадиев 130 килограмм нелытан- влак коклаште той призёр лийыныт. Муса Галлямов 130 килограмм нелытан- влак коклаште Российын кумшо гана чемпионжо лӱмым сеҥен налын.