Таче Александр Евстифеев Москошто умбакыже пашам ыштен

Таче Российысе Федераций Советыште Марий Элын кечыжын лектышыже почеш пуымо кӱштымаш- влакым кузе шуктымын ончылгоч ыштыме лектышыжым каҥашыме. Марий Элым вуйлатыше Александр Евстифеев Республикын делегацийже дене пырля Россий парламентын кӱшыл палатыштыже кӱлешан заседанийыште лийыныт. Тушто Марий Элын кечыжым эртарыме годым пуымо кӱштымаш- влакым шуктымым ончымо. Мутлан, Марий Эллан социал-экономик полыш нерген пунчалым шуктымым аклыме. Тиде пунчал почеш тергыме жап Федераций Советыште 2020-шо ийысе шошо сессий годым лиеш. Но кызытак  федерал кучем орган- влак да Марий Эл деч сенатор Сергей Мартынов дене пырля ончылгоч иктешлымаш- влакым ончымо. Александр Евстифеевын мутшо почеш, тудо заседаний марте вич ий мучко Йошкар-Оласе перинатал рӱдерым пужен ыштыме шотышто йодышым, 8 ий авиакыл шотышто пашам виктарен колташ лийын огыл. Ынде тиде сомылым шуктымо. Перинатал рӱдерым кок ий чоҥаш тӱҥалына, самолёт Москваш чоҥештылеш, январь гыч эше ныл кундемыш корно почылтеш. Икманаш Федераций Советын пунчалжын ик пунктшо денат пашам ыштыде кодымо огыл. Кугыжаныш оборонзаказым шуктымаш тыгак мыланна кӱлешан йодыш. 
Молан манаш гын, мемнан дене оборонный комплекс уло, тудо пашам ышта. Тиде- паша вер, пашаче коллективым арален кодымаш, калык кучылтмо сатум лукмаш. Тидын шотыштат регионышо паша чолган виктаралтеш, - каласен Александр Евстифеев.