Александр Евстифеев Москошто Российын транспорт министрже Евгений Дитрих дене вашлийын
Таче Марий Элым вуйлатыше Александр Евстифеев Москошто пашам ышта. Тудо Российын транспорт министрже Евгений Дитрих дене вашлийын. Тудо министрлан Йошкар-Ола аэропортын пашажым уэш тӱҥалымлан тауштен да корно шотышто калыкле проектым шыҥдарыме нерген раш каласкален. Транспорт министр регионысо кучемын пашажлан сай акым пуэн да республике пашам ыштен мошта, тыгай регион- влаклан оксам ойыраш кӱлеш, манын. Александр Евстифеев ешарен: тыгай полыш деч посна авиакылым ышташ ок лий ыле. Республике 8 ий туддеч посна илен. Ынде тиде вожылмашан проблеме кораҥдалтын. Аэропортын рентабельностьшо коеш. Ынде Моско деч посна моло кундемлашкат самолёт- влак чоҥештылаш тӱҥалыт. Корным олмыктымо пашаште республике сайын тырша. Олмыктышаш 100 меҥге олмеш 116 меҥге кужытым олмыктымо. Йошкар-Ола агломерацийым шотлаш гын, 153 меҥге олмеш 173 меҥгым ыштыме. Но тиде пашан тӱҥалтышыже гына. Корным чоҥымаште ик эн кугу пашаже Киров ден Строитель урем- влакым ушымаш. Тудын акше вич миллиард теҥгеш шуэш. Пашам тӱҥалме. Тенийлан вич миллион теҥгем ойырымо, все ийлан 500 миллион лийшаш, 22-шо ий марте эше 750 миллион теҥгем. Тыгак серым пеҥгыдемдыме, Республике мучко шуйнышо Юл эҥер серыште грузовой да пассажир причал- влакым ыштыме нерген ойлымо. Икманаш, пеш кӱлешан йодыш- влакым тарватыме да кажныж дене решенийым лукмо.
