Татарстанысе Юнармеец- влак Волжск олаште землякыштын чапкӱшт воктене вуйым савеныт

Пошкудо Татарстан гыч Юнармеец- влак Волжск олаш толын каеныт. Рвезе-ӱдыр- влак Сеҥымаш Пракыште вераҥдыме Герой- влакын бюстышт да вуйым пыштыше салтак-влаклан обелиск воктеке пеледышым пыштеныт. Юнармеец- влак тыгак патриотизм шӱлышеш шуарыме рӱдерысе «Защитник» клубыш миеныт. Герой- влакын кечыштым палемдыме деч ончыч Татарстанысе юнармеец- влак шке землякыштым шарналтеныт. Волжский районысо кок школ Татарстаныште шочшо кок Геройын лӱмыштым нумалыт. Тиде Совет Ушемын Геройжо Андрей Кошкин ден Слава орденын тичмаш кавалерже Иван Субботин.