Йошкар-Олаште У ийлан ямдылалтмаш рӱж кая

Тений Йошкар-Оласе Ленин лӱмеш площадьыште ий каток ок лий. Ола администрацийыште У ий пайремым эртарыме вашталтыш- влак дене палдареныт. Каток шке вержым вашталта. Тудлан верым Сеҥымаш Паркыште ямдылыме. Йӱштӧ лиймеке, тушто вигак ийым кылмыкташ тӱҥалыт. Пайрем деч вара тушто кудывечыласе команде- влак коклаште хоккей дене турнир- влак эртаралташ тӱҥалыт. А Ленин площадьыште каток олмеш аттракцион ден ий скульптуро- влакым вераҥдат. Тиддеч посна эше индешымше микрорайонышто «Планета мебели» ужалкалыме рӱдер ваштареш да Сомбатхейыште Воскресенский парк воктене катокым ышташ палемдыме. Пайрем мероприятий нерген ойлаш гын, Ленин площадьыште 20-шо декабрьыште кож шке моторлыкшым чӱктышаш. Лач тиде кече гыч пайрем тӱҥалеш да 19-ше январь марте шуйна. Но 31-ше декабрьыште, икымше, шымше, 13-шо да 19-ше  январьыште кугу пайрем программе лийшаш. 20 метран тӱҥ кож деч посна Сеҥымаш паркыште 15 метран да Россий Армийын тӱвыра полатше воктене 10 метран кож- влак куандараш тӱналыт. Туштат мероприятий- влак эртаралтыт. Пайремлан ямдылалтмаш уло куатын кая.