Сад-пакча ушем- влакын тенийсе пашаштым иктешлыме

Республикысе ял озанлык да кочкыш сату министерствыште министр Александр Гречихон вуйлатыме почеш сад-пакча товариществе- влакын вуйлатышышт дене совещаний эртен. Тудын пашаштыже министерствын специалистше, федерал налог службо виктемын, электросеть компанийын, «Гюрза» оролышо предприятийын да «Российысе садовод- влак ушемын» марий пӧлкажын еҥышт да сад- пакча товариществылан вуйлатышышт лийыныт. «Российысе садовод- влак ушемын» марий пӧлкажым вуйлатыше Геннадий Петрушин тенийсе пашам иктешлен да шушаш ийлан план дене палдарен. Тыгак тудо республикым вуйлатышын садовод да товарищество- влаклан электроэнергий дене пайдаланымылан шагалрак тӱлыкташ кӱштымыжым кузе шуктымо нерген ойлен. Налог службын пашаеҥже- влак погылан налогым тӱлымӧ ойыртем нерген ойленыт да йодыш- влаклан вашештеныт. Йошкар-Оласе электросеть компанийым вуйлатыше электроозанлык объект- влакым сеть компанийыш кусарыме нерген умылтарен. Тиде жаплан 14 товариществе электросеть компаний дене электроозанлыкым арендыш налаш ойпидышым пеҥгыдемдаш палемден. «Гюрза» предприятийын еҥже оролымо шотышто могай полыш пуалтме нерген ойлен. Ял озанлык министр садовод- влак пӧлкан пашажым иктешлышыла, задаче- влакым сайын виктарен колтымым палемден. Вуйлатыше- влаклан исполнительный кучем да верысе самоуправлений орган- влак дене пырля пашам вияҥден колташ темлен. Тений идалык мучко чолган пашам ыштымылан министерствын Чап Грамотыжым «Ошурга» да «Досаафовец» товариществе- влакын вуйлатышыштлан кучыктымо. А «Гигант», «Политехник», «Энергетик», «Строитель», «Волгарь» да «Коммунальник» товариществылам вуйлатыше- влаклан тауштымашым увертарыме. Садовод- влак ушемын марий пӧлкажым вуйлатышылан ик йӱк дене уэш Геннадий Петрушиным сайлыме.