У ий вашеш «Йоча- влаклан пайремым пӧлеклена» поро кумыл акций тӱналын

Йошкар-Олаште У ий вашеш «Йоча- влаклан пайремым пӧлеклена» поро кумыл акций тӱналын. У ий ден Рошто пайремым йоча- влак пӧлекым налме пайрем семын вучат. Но кажне йочан тыгай шонымашыже ок шукталт. Сандене туныктыш виктем идалык еда тыгай акцийым эртара. Рӱдӧ олаштына неле илышыш логалше вич тӱжемат 987 йоча шотлалтеш. Тиде- начаррак илыше але кӱлеш семын илыдыме ешлаште кушшо икшыве, тулык йоча, ача-аван полышыж деч посна кодшо йоча- влак. Нуным куандараш неле огыл. Кажне кумылан еҥ оласе тунемме тӧнежлашке миен, пӧлекым кучыктен да саламлен кертеш, ешлашкат мияш лиеш. Тидлан Йошкар-Оласе туныктыш виктемыш 45-36-75 номеран телефон дене йодмашым пуыман. Пӧлекым 25-ше декабрь марте Комсомольский уремысе 134-ше пӧртыштӧ погат. Вара нуным 26-шо декабрьыште Сеҥымашын 30-шо идалыкше лӱмеш тӱвыра полатыште «У ий, Маша да Маска» лӱман пайремыште кучыктат.