«Ростелеком» Республикын 100 ияш лӱмгечыже вашеш Ай-Ти форумым эртара

Марий Элым вуйлатыше Александр Евстифеев «Ростелкомын» «Волга» макрорегиональный филиалжым вуйлатыше Иван Зима дене вашлийын. Мутланымаш Правительстве пӧртыштӧ эртен. Александр Евстифеев Иван Зимам тиде кугу должностьыш сайлыме дене саламлен да каласен: ме «Ростелеком» компаний дене кылнам аклена. Предприятий республикылан ик эн тӱҥ налогым тӱлышӧ улеш. Тушто пашам ыштыше- влакын чотышт денат тудо ончылно кая. Мемнан дене шуко шыҥдарыме да пашам ыштыше проект- влак улыт. Тиде- кыл йӧным вияҥдымаш, цифрым шыҥдарымаш, «Лӱдыкшыдымӧ ола» системын программыже да шуко молат. «Ростелекомын» еҥже вашештен: кеч-могай компаний регион дене пайдале кылым ыштен гын веле, лектыш сай лиеш. Сандене тыгай кыл улмылан республикым вуйлатышылан тауштен ойлен. Компанийыште кызыт у толкын кая- социал кӱлешан объект- влакым увер сеть деке ушымаш. Тений гына 136 объектым ушымо. Лишыл кок ий жапыште эше 323-ым ушаш кӱлеш. Ӱшанена: калыкат, бизнесат тидым аклен шукта. Республикыште сеть- влак вияҥыт, оптоволоконный линий- влакым шупшыт. «Лӱдыкшыдымӧ ола» теме дене пашам эше кугемдаш лиеш. «Ростелеком» компаний кызыт «цифран партнёрыш савырна». Предприятий Ай-Ти корно дене вияҥеш, интернет ден связь каналым ситарыше телеком-оператор семын веле огыл, а комплексный полышым пуа. Александр Евстифеев тыгай шонымашым темлен: республике шушаш ийын 100 ияш лӱмгечыжым палемда. Социал корнан иктаж-могай проектым шонен лукташ кӱлеш. Тек тудо республикысе калыклан бонус семын лиеш. Иван Зима вигак «ямде улына» манын. Лӱмгече вашеш Ай-Ти форумым эртараш темлен. Тушко прорграмме продуктым ыштыше- влакым, кугу бизнесым ӱжаш да форум кышкарыште илышын тӱрлӧ шӧрынжылан- ЖКХ, ола инфраструктурылан, туныктымо, медицина пашалан пӱсын шогышо увер решенийым кычал муаш темлаш. «Ростелеком» тиде мероприятийым ямдылыме пашам шке ӱмбакыже налаш ямде, манын. Александр Евстифеев тиде тӱҥалтышым авалтен да тудым эртараш пашаче группым ышташ кӱштен.