Воробьи- Табашино корно шушаш ийын шыжылан ямде лийшаш
Шушаш ийын октябрьлан эше ик корным капитально олмыктен шуктышаш улыт. «Лӱдыкшыдымӧ да сай качестван автомобиль корно- влак» калыкле проектым шыҥдарыме кышкарыште Воробьи- Табашино корным капитально олмыкташ контрактым ыштыме. Оршанке районысо тиде корно «Вятка» федерал трассе деке ушнен шога. Тудым 1976-шо ийыште ыштыме. Тымарте сайынак лунчырген. Олмыктымо пашан икымше ужашыже семын, жаплан кораҥ кайыме корным ыштыме. Тиде объездной корно дене Табашино селаште, Тошто Пижан ялыште илыше- влак пайдаланат да нефтьым перерабатыватлыше заводыш коштыт. Пашан кокымшо йыжыҥже семын корным капитально олмыктымаш лийын. Тенийсе ийлан республикын казнаж гыч 92 миллион теҥгем ойырымо. Воробьи- Табашино корным олмыктымо пашан акше кок ийлан 169 миллион теҥгеш шуэш. Объектым шушаш ийын октябрь марте тичмаш ыштен шуктышаш улыт.