Декабрьлан пенсийым вес жапыште кондат
Декабрьыште пенсийым вес график почеш кондаш тӱналыт. Пенсий фондын республикысе пӧлкажын увертарымыж почеш декабрьлан пенсийым да моло социал оксам 19-ше декабрь марте пуэн пытарышаш улыт. Графикым кӱчыкемдымаш Доставке службо да Российын Почтыж гоч пенсийым налше- влакым гына тӱка. Республикыштына 211 тӱжем утла пенсионер уло. Тушечын 25 процентше Российын Почтыж гоч, 16 процентше Доставке службо гоч налыт. Моло 59 процентше кредит тӧнежла гоч налеш. Банк- влак тыглай график почешак пашам ыштат.
