Мутерым ыштымаш йылме йодышышто кугу верым налеш

Таче, Марий тиште кечын, Республикысе мер-политик рӱдерыште «Марий мутер: теҥгече, таче, эрла» теме дене шанче-практик семинар лийын. Кызытсе марий йылме йодышышто кугу верым тӱрлӧ мутерым ыштымаш налеш. Тиде- кок йылман, терминологий, диалект, фразеологий, отраслевой да моло мутер- влак. Мутер кӱлешан социал функцийым шукта: мут поянлыкым вашке кычал муаш, калык- влак коклаште вашкылым ышташ, ойым чын кучылташ да литератур нормым эскераш полша. Сандене лексикографий йодыш деке эре тӱткыш лийшаш. Семинарыш кугыжаныш пашаеҥ, тӱвыра да туныктыш аланыште тыршыше, студент да йылмым эскерыше- влак погыненыт.