«2019-ше ийын футболистше» верч йӱклымаш эрта

Марий Элыште футболым йӧратыше- влак тенийсе эн сай модшым ойырат. Социал сетьын «Гордей» группыштыжо «2019-ше ийын футболистше» верч йӱклымаш эрта. Тиде лӱмым налаш «Дружба» команде гыч Константин Бастраков, РМТ гыч Максим Голдабин, ЗПП гыч Сергей Горев, «Крылья Советов» гыч Геннадий Киселёв, «Волжск» гыч Марат Мирсадыков, «Нефтехимик» гыч Лев Потапов, РМТ гыч Роман Садовин кучат. Йӱклымаш тӱҥалмеке, кок арня эртымеке, йодыштмашке тӱжемат 773 еҥ ушнен, ӱмаште ик тӱжемлан шукырак ыле. Эн шуко йӱкым кызытеш Нижнекамск гыч «Нефтехимик» клубын защитникше Лев Потаповлан пуымо- 603 еҥ. Кокымшо верыште 298 йӱк дене «Волжск» клуб гыч Марат Мирсадыков, кумшышто РМТ гыч Роман Садовин. Тудлан 289 еҥ йӱкым пуэн. Йӱклышӧ- влакын шонымашышт 33 эксперт коклаште ик йӱк семын аклалтеш. «Гордей» марий профессионал футбол премийым пуымаш 6-шо январьыште  эрта.