Мусульман- влак пӱтылан ямдылалтыт

         Кундемысе мусульман- влак пӱтылан ямдылалтыт. Пӱтӧ тӱҥалтышым нуно Рамадан маныт. Тудын тӱҥалтышыже кажне ийлан ойыртемалтше. Тений тудо 23-шо мартлан логалеш. Рамадан мусульман календарьын 9-ше тылзыже. Тиде тылзе мусульман йӱлам кучышо- влаклан эн кӱлешан да эн почётанлан шотлалтеш. Тылзе мучко пеҥгыде пӱтым- уразам кучат. Тудын почеш стукан волгыдо жапыштыже вӱдым огыт йӱ, кочкышым огыт коч, вате-марий сомылым огыт ыште. Рамадан тылзе ден пӱтӧ кӱлешлык шот дене кокымшо пайрем- Рамадан байрам дене мучашлалтыт. Мечетьыште тӱшкан юмылтымаш деч вара мусульман- влак пайрем сийым тамлаш каят. Тиде жапыште нуно родо-тукым да лишыл еҥ- влакым гына огыл, могай юмылан кумалмым шотыш налде пошкудо, палыме- влакымат сийлат. Сийлымаш пайремын тӱҥ условийжылан шотлалтеш. Пайрем кечылаште тыгак лишыл еҥыштын шӱгарышкышт мийышаш улыт.