Республикыште тений Россий кӱкшытан конкурсышто сеҥыше кум проектым шыҥдараш тӱналыт

            Республикыште тений йӧнан оласе кумдыкым ышташ эн сай проект- влакын Россий кӱкшытан конкурсыштышт сеҥыше кум проектым шыҥдараш тӱналыт. Звениговышто причал воктене эҥер серым тӱзландарат, Козьмодемьянскыште композитор Яков Эшпай лӱмеш скверым, Волжскышто рӱдӧ площадь ден Ленин уремын ужашыжым олмыктат. Нине пашалан чылаже 240 миллион теҥгем ойырымо. 2023-шо 2025-ше ий- влаклан ойырымо окса кышкарыште калыкле проект- влакым шуктымо, «Оласе йӧнан кумдыкым ыштымаш» проектым шыҥдарыме нерген Российыште регионлам вияҥдыме шотышто Правительстве комиссий Президиумын заседанийыштыже ойлымо. Тушто Марий Элым вуйлатыше Юрий Зайцев участвоватлен. Тӱналтышыште тенийлан задаче- влак дене Российын чоҥымаш, илыме вер да коммунал озанлык министрже Ирек Файзуллин палдарен. Республикыште 77 кумдыкым- 29 кудывечым да 48 тӱшка кумдыкым тӱзландараш палемдыме. Чыла объектше шотыштат контрактым ыштыме. Сеҥыше проект- влак дене документаций ямдылалтеш, вара олмыктымо паша тӱҥалеш. Марий Элым вуйлатыше чыла проектым шыҥдарымым контрольышто куча.
             Фото: Марий Элым вуйлатышын  администрацийжын увер дене пашам ыштыше пӧлкаже.