Тений республикыштына ӱдымӧ кумдык 300 тӱжем гектарым эрта

              Тений республикыштына ӱдымӧ кумдык 300 тӱжем гектарым эрта. Тидын нерген Марий Элым вуйлатыше Юрий Зайцевлан ял озанлык министр Андрей Кондратенко увертарен. Тудын мутшо почеш тений пырчан, пырчан да отызан культура, саска, пареҥге утларак кумдыкым айлат, а технический да кормалык культура ондаксе семынак кумдыкеш вераҥдалтеш. Чыла озанлыкыште тений пырчым 307 тӱжем гектареш ӱдаш палемдыме. Кокияшым 47 тӱжем утла гектареш ӱден кодымо. Тушечын 20 тӱжемже- шыдаҥ, 24 тӱжемже- уржа. Министрын мутшо почеш аграрий- влак 98 процент элысе селекцийын урлыкашыжым кучылтыт. Кызыт республикыште урлыкашым куштышо 10 озанлык уло. Нуно пырчым республикылан веле огыл, ӧрдыжкат ужалат. Тыгай сай вашталтыш, палемден республикым вуйлатыше, Россий ваштареш ыштыме санкций-влак АПК сферылан кугу чаракым огыт ыште, кочкыш сату шотышто лӱдыкшӧ уке. Республикын шкенжын вольык озанлыкыште, урлыкашым куштымаште, кургым шапашлымаште кугу куатше уло. Кодшо ийын лектышыже, ӱдышаш тургым лӱдыкшым огыт лук. Тургымышто сай лектышым налаш, шкенан урлыкаш базым ышташлан жапыштыже урлыкашым, техникым ситарен шогыман,- каласен Юрий Зайцев. Андрей Кондратенкон мутшо почеш, тенийсе шошо агам эртарен колташ тӱжемат 721 трактор, тӱжемат 566 мландым пушкыдемдыше машин, 545 сеялке уло. Ятыр ял озанлык сатум ыштен налше- влак шкенан элыште лукмо техникыш кусна. Тений шошо ага пашалан 922 механизатор кӱлеш лиеш. Нуным тичмаш ситарена. Ӱдымо жаплан ямдылалтме паша палемдыме семынак кая,- каласен ял озанлык министр.
         Фото: Марий Элым вуйлатышын администрацийжын увер дене пашам ыштыше пӧлкаже.