Рушарнян илыме вер ден коммунал озанлык пашаеҥ-влакын кечышт палемдалтеш

             Поро йӱла семын мартын кумшо рушарнянже быт отбслуживаний да илыме вер ден коммунал озанлык пашаеҥ-влакын кечышт палемдалтеш. Республикысе илыме вер да коммунал озанлыкыш 500 наре предприятий пура, тушто лу тӱжем еҥ пашам ышта. Теҥгече Яков Эшпай лӱмеш марий кугыжаныш филармонийыште торжественный мероприятий лийын. Тушто калыклан быт полышым пуышо пашаеҥ да илыме вер ден коммунал озанлыкыште тыршышше- влакым саламленыт. Марий Элым вуйлатышын лӱмжӧ дене Погынышо- влак ончылно Правительстве вуйлатышын алмаштышыже Александр Сальников ойлен. Тудо палемден: тендан пашам ыштыме отрасль кажне еҥын илышыштыже путырак кӱлешан. Лач те коммунал системылан чаткан ышташ полшеда, илыме вер фондым олмыктеда, кудывече ден уремлаште арулыкым ыштеда. Марий Элым вуйлатыше шке пайрем саламлымашыштыже палемден: вӱдым ситарыме, тудым йоктарен колтымо, шокшым ситарыме объект- влакын чарныде пашам ыштышт манын республикыште коммунал инфраструктурын объектлаже-шамыч чоҥалтыт але пужен ышталтыт. 2023-шо 2024-ше ийлаште инфраструктурым уэмдыме пашам Козьмодемьянскыште, Звенигово, Медведево, Морко, Шернур, Юрино районлаште эртараш палемдыме. Тушко кундемлам вияҥдыме фонд гыч 615 миллион теҥгем коташ палемдыме. Республике «Илыме вер да оласе кумдык» калыкле проектын «Ару вӱд» федерал программыштыже, «Экологий» калыкле проектын «Юл эҥерым тазаҥдымаш» программыштыже чолган пашам ышта. «Ару вӱд» проект кышкарыште куд районышто 8 объектыште паша шукталтеш. Тушечын шымытшым тений шуктышаш улыт. «Юл эҥерым тазаҥдымаш» проект кышкарыште Килемар, Марий Турек да Параньга районлаште кум объектым пужен ыштат, Йошкар-Оласе очистной сооруженийыште паша умбакыже шуйна. Александр Сальников ушештарен: тений кугу паша- влак вучат да коммунал сферын пашаенже- влакым тыршен ыштымыштлан тауштен да ончыкыжымат лектышан пашам тыланен.
             Фото: Марий Элым вуйлатышын  администрацийжын увер дене пашам ыштыше пӧлкаже.