Марий Элыште капитально чоҥымо икмыняр объектым жап деч ончыч шукташ палемдалтеш

               Марий Элыште капитально чоҥымо икмыняр объектым жап деч ончыч шукташ палемдалтеш. Регионлаште объектлам ончылгоч чоҥен шуктымо нерген Россий Правительстве председательын аламаштышыже Марат Хуснуллинын эртарыме совещанийыште ойлымо. Тушто Марий Элым вуйлатыше Юрий Зайцев участвоватлен. Республикыште калыкле да федерал  проект- влак графикым ончылтен шыҥдаралтыт. «Юл эҥерым тазаҥдымаш», «Ару вӱд», «Илыме вер», «Качестван лӱдыкшыдымӧ корно» проектла почеш чоҥымо объект- влакым пашаш колтымым 2024-ше ий гыч тенийыш кусараш палемдыме. Кызыт тидын шотышто Россий чоҥымаш министерствыш субсидийым уэш  палемдыме шотышто темлымашым колтымо. Мутлан, Йошкар-Оласе очистной сооруженийым чоҥымо икымше йыжыҥжым 77 процентлан шуктымо. Графикым 158 кечылан ончылтен шукталтеш. Объектым мучашлаш вес ийысе окса гыч тенийлан 410 миллион теҥгем кусараш кӱлеш. «Ару вӱд» федерал проект дене келшышын Морко районышто- Кокласола ялыште, Октябрьский ден Зеленогорск посёлкылаште вӱдым ситарыме системым пужен ыштыман. Контракт- влакым пеҥнгыдемдыме. Подряд организаций пашам тенияк шукташ ямде. Апшакбеляк ялыште посна пӧртлам чоҥаш ойырымо мланде участкылашке автомобиль корным чоҥымашат графикым ончылтен чоҥалтеш. Тыгак Йошкар-Оласе йӱрвӱд йогымо канализацийым пужен ыштымаш объектлан оксам ончылгоч ойыраш темлымашым колтымо. Сай вашталтыш корным чоҥымаштат лийшаш. Республике тений 100 меҥге наре корным ешарен чоҥен шукташ ямде улеш. Республикым вуйлатыше палемден: кӱлеш документацийым жап деч ончыч ямдылымаш, калыкле проектым шындарыме жапым пеҥгыдын эскерымаш социал, транспорт, инженер инфраструктурым вашкерак да пайдалынрак уэмдаш да федерал рӱдер деч ешартыш окса полышым налаш йӧным пуа.
             Фото: Марий Элым вуйлатышын  администрацийжын увер дене пашам ыштыше пӧлкаже.