Теҥгече да таче марий У ий палемдалтеш

        Теҥгече да таче марий У ий палемдалтеш. Тиде шуко калыкан элыштына йӧратыме пайремын эше ик вариантше. Марий калык акрет годым шошо кечын да йӱдын иктӧр лиймышт жапыште, пӱртӱс ылыжаш тӱҥалме годым у идалык толмым палемден. Тыге таче йӱдым у идалыкым шотлаш тӱҥалме. Тиде пайремым эше маска помыжалтме кече семын шарненыт. Шошо пайрем маныныт. Адакшым марий йӱла почеш кажне ийлан янлык але кайык лӱмым пуэныт. Тыге пӱртӱс-авалан вуйым савеныт. Тыге тений гепард идалыкым кӱдыр ий вашталтен. Марий мифологийын эше ик йӧратыме персонажше- марий Йӱштӧ Кугыза. Республикын эн йӱдвел ужашыштыже Шернур велысе Кукнур селаште тудын резиденцийже верланен. Марий Эл деч сенатор Сергей Мартынов Йӱштӧ Кугыза деке миен. Тудын пӧртшым ура чонан еҥ- влак 2012-шо ийыште ыштеныт. А тачылан тудо йомакысе гай чапле илемыш савырнен. Резиденций писын кушкеш да вияҥеш. Кызыт тудо республикысе ик кугу турист рӱдер- куанен палемден сенатор. Кодшо гана мийымыже деч вара икмыняр тылзе гына эртен. А тиде жапыште икмыняр у оралте кушкын шогалын. Йӱштӧ коча Анатолий Конаков да тудын командыже, район администрацийым вуйлатыше Александр Кугергинын да республикысе кучем полшымо дене тысе инфраструктурым у кӱкшытыш нӧлталме. Унагудым чоҥымо, мангал площадке уло, скважиным шӱтен вӱдым лукмо, концертлан сцена шочын, тулым пуртымо, корным чоҥымо. Икманаш кодшо ий арам эртен огыл. Сенатор палемден: тиде проект дене шӱлышӧ чолга еҥ- влак Йӱштӧ Кугызалан у пӧртым, кок пачашаным, террасан, пандусаным чоҥаш тӱҥалыт. Икманаш турист- влаклан чыла йӧн ышталтеш. Инвалид –влаклан ешартыш йӧным ышташ манын сенатор полшаш ММЗ-н директоржо Борис Ефремовым полшаш йодын.
            Фото: Сергей Смирнов.