Марий Элысе кок эмлыме верыш куснылшо медицина комплекс- влакым кондымо
Марий Элысе кок эмлыме верыш куснылшо медицина комплекс- влакым кондымо. Нуным федерал окса кӱшеш налме. Иктыже куд миллионат 390 тӱжем теҥгеаш, ГАЗ автомобиль негызеш ыштыме. Тудым Волжскысо эмлыме верыш колтымо. Весыже 15 миллионат 380 тӱжем теҥгем шога, ПАЗ автобус негызеш келыштарыме. Тудыжо Килемар эмлыме верыш каен. Килемар эмлыме верын тӱҥ врачше Еки Гогинаван мутшо почеш, комплексыште флюорограф уло. Тидыже моткоч кӱлешан, молан манаш гын, районышто туберкулёз дене черланыше- влак шукын улыт. Сандене яллашке лектын кошташ да диспансеризацийым эртарашат йӧн лектын. Волжскышто у комплекс икмыняр ий ончыч налме тыгаяк комплекслан ялласе калыкым тергаш ешартыш полыш лиеш. Кеч-могай тора ялласе калым шымлаш лиеш, - каласен Волжск оласе рӱдӧ эмлыме верын тӱҥ врачше Ильдар Ибрагимов.
