Марий Элым вуйлатыше Юрий Зайцев «Систэм Электрик» компанийын генеральный директоржо Алексей Кашаев дене вашлиймашым эртарен

          Козьмодемьянскыцсе «Потенциал» заводым вияҥдаш «Систэм Электрик» ик миллиардат 500 миллион теҥгем инвестироватла. Марий Элым вуйлатыше Юрий Зайцев «Систэм Электрик» компанийын генеральный директоржо Алексей Кашаев дене вашлиймашым эртарен. Электротехник сатум лукшо «Птенциал» заводышто тиде компаний производствым умбакыже вияҥдаш, кугу оксам пышташ да предприятийым у кӱкшытыш лукташ шона. Вашлиймашын тӱҥ цельже- республикым вуйлатышын Козьмодемьянскысе градообразующий предприятийын кодшо ийысе пашаже дене палыме лияш шонымашыже ыле. «Потенциал» европысо компонент- влакым тӱрысынек алмашташ шона. Кызыт тудо Российысе да Азий элласе 40 поставщик дене кылым куча, тушто тӱжемат 750 еҥ пашам ышта. Производствым кумдаҥдымаш эше 600 пашаеҥым налаш йӧным пуа. Предприятий оласе лу процент калыклан пашаверым ситара да бюджетым пойдара. Генеральный директор палемден: шке профильже дене тӱнямбалсе ик эн кугу  предприятий кодшо ийын у продукцийым лукташ тӱҥалын: компьютерлан розеткым, мобильный устройствылан писын зарядитлалтше ЮСБи розеткым, диммерым ямдыла. Сатужо Российыште гына огыл, моло эллаштат йодмаш дене пайдалана. Российыште ужалыме кажне кумшо розеткыже- «Потенциалыште ыштыме.
             Фото: Марий Элым вуйлатышын  администрацийжын увер дене пашам ыштыше пӧлкаже.