Марий Эл тул пижме лӱдыкшӧ тургымлан ямде

Теҥгече Марий Элым вуйлатыше Александр Евстифеев Российысе кундемлам вуйлатыше- влак дене пырля пожар лӱдыкшӧ тургымлан ямде улмо йодыш дене селектор совещанийыште лийын. Видеоконференцийым Российын пӱртӱс поянлык да экологий министрже Дмитрий Кобылкин эртарен. Тудо палемден: регионлам вуйлатыше- влак ӱмбалне кызыт могай кугу паша улмо нерген раш палем, но тул пижын кертме лӱдыкшат калыкын тазалыкшым  да илышыжым арален кодымаште кӱлешан йодыш. Тений чодыраште тул пижын кертме лӱдыкшӧ кугу лиеш. Тул ваштареш кучедалме тургым элыштына уже тӱҥалын, - каласен Кобылкин. Рӱдӧ да Тора эрвел федерал округлаште чодыра пожар  лӱдыкшӧ кугу. Марий Элыште тений чодыра пожарым йӧртымӧ сводный планым пеҥгыдемдыме. Тудын дене келшышын, тиде пашашке ныл тӱжемат 21 еҥым, 648 техникым ушаш да 6 тӱжем наре оборудований ден ӱзгарым кучылташ палемдыме. Ӱмашсе дене таҥастарымаште техникым 9 единицылан, вийым 183 еҥлан ешарыме. «Чодырам аралымаш» федерал проект кышкарыште кодшо ийын республикылан 52 миллион утла теҥе оксам ойырымо ыле. Тудын дене 24 техникым да 11 оборудованийым налме. Тений ешарен 13 технике ден оборудованийым налаш палемдыме. Тыге спецтехнике да оборудований дене пойдарымаш 74 процентыш шуэш. Тидыже тенийлан калыкле проектын палемдымыж дене келшен толеш.