Финно-угор турист маршрут лийшаш

Российысе финн-угор кундем- влак пырля турист маршрутым ышташ шонат. Кодшо кечылаште Саранск олаште «Туризм дене финн-угор кумдык» Россий кӱкшытан шанче-практик конференций эртен. Погынышо- влак туризмым вияҥдыме сомылым «йыргешке ӱстел» йыр каҥашеныт гына огыл, республикын рӱдолажын турист потенциалжым шке аклен кертыныт. Нуно тоштерлаш, ареныш. университетын ончымо площадкышкыже экскурсий дене миеныт. Конференцийыште Мордовийын, Марий Элын, Удмуртийын да Пенза областьын еҥышт лийыныт. Нуно ик шонымашым луктын ойленыт: туризм пашаште финн-угор регион- влаклан ушнаш кӱлеш, турист маршрут- влакым пырля ышташ да тудын дене элысе да йот элласе турист- влакым палдараш кӱлеш. Мордовийын спорт-туризм министржын алмаштышыже Марина Жулина палемден: Российыште 7 финн-угор кундем уло, а тӱнямбалне эше кум эл- Венгрий, Финляндий да Эстоний. Йот элла гыч турист- влакым кондаш манын, мемнан регион- влак ик финн-угор кумдык лийшаш улыт. Марий Эл гыч турагентствым вуйлатыше Светлана Иванован мутшо почеш, этнический ойыртем нерген шукырак ойлена гын, турист- влаклан утларак оҥай лиеш. Кызыт тӱшка проектым ышташ кӱлеш, регион-влак кокласе маршрутым чумырыман.