Корно озанлык пашаеҥ- влак профессионал пайремыштым палемденыт

Теҥгече Российыште корно озанлык пашаеҥ- влакын профессионал пайремыштым палемдыме. Тудо 1996-шо ий гыч октябрьын кумшо рушарнянже эртаралтеш. Элысе корно озанлыкыш кум тӱжем тӧнеж ден предприятий пура. Корно озанлык дене кылдалтше  отрасльлаште 750 тӱжем еҥ тырша. Республикым вуйлатыше Александр Евстифеев корно озанлыкыште тыршыше да тудын ветеранже- влакым профессионал пайремышт дене саламлен. Корно озанлык отрасль кызытсе экономикын ик эн кӱлешан ужашыжлан шотлалтеш. Виян инфраструктура, калыклан йӧнан вер, инвестор- влаклан регионын корно поянлыкше- чылажат тендан кажне кечын ыштыме пашада деч шога. «Лӱдыкшыдымӧ да сай качестван автомобиль корно-влак» калыкле проект почеш тений тӱшкан пайдаланыме 126 меҥге кужыт автомобиль корным олмыктышаш улына. Йошкар-Ола агломерацийыш пурышо муниципалитетлаште рӱдӧ урем- влак олмыкталтыт. Тидыже пашаеҥ- влакым пеҥгыдемдаш, предприятий- влакын куатыштым нӧлталаш, технологийым вияҥдаш да илышым саемдаш полша. Ончылно корно сетьым вияҥдыме шотышто эше шуко паша вуча. Посна тауштымаш- ветеран- влаклан. Ятырже сулен налме канышыш лектын гынат, шке опытшым, моштымашыжым самырык тукымлан пуа. Чылалан кӱлешан пашаштыда сеҥымашым, шындыме задаче- влакым пайдалын шукташ тыланем, - ойлалтеш республикым вуйлатышын саламлымашыштыже.