Республикым вуйлатыше депутат- влаклан экономикым вияҥдыме корным кычалаш ӱжын ойлен

Марий парламентын тӱҥ комитетлаштыже депутат- влак республикысе аграрный да промышленный комплексым  вияҥдыме корным каҥашаш тӱналыт. Тидын нерген парламентарий- влак Республикым вуйлатыше Александр Евстифеевлан ойленыт. Тудыжо кызыт Кугыжаныш Погынын комитетлажым вуйлатыше- влак дене вашлиймаш- влакым эртара. Тиде гана тудо производственный комплексым вияҥдыме шотышто комитетым вуйлатыше Игорь Бондарчук да агропромышленный комплексым вияҥдыме шотышто комитетым вуйлатыше Аркадий Новиков дене вашлийын. Бондарчук каласен: кугу промышленный комплексыште пашам ыштыме опытем уло, кок созывышто ола озанлыкын депутат комиссийжым вуйлатенам. Тыгай опыт пайдале лийшаш. Промышленностьышто йодыш шуко. Кажныжым ончаш тӱҥалына, палемден Йошкар-Оласе икымше ТЭЦ-ым вуйлатыше Игорь Бондарчук. Парламентын эше ик кӱлешан комитетше- агромышленный комплексым вияҥдыме шотышто комитет. Тудлан мутым «Первый май» озанлыкым вуйлатыше Аркадий Новиков кучаш тӱҥалын. Марий Элысе агропромын кушкын толмыжым сай могырым палемдаш кӱлеш: урожай ешаралтеш, кугу холдинг, фермер озанлык- влак вияҥыт. Депутат- влак дене комитетыште ыштыме пашана республикысе яллан пайдам кондыжо манын тыршаш тӱҥалына, - каласен Новиков.