Кугыжаныш огыл пенсий фонд- влак пужен ышталтыт

Россий пенсий фондын Марий пӧлкаже шижтара: икмыняр кугыжаныш огыл пенсий фонд пужен ышталтеш. Мутлан, «Социал вияҥмаш», «Образование», «Согласие» фонд- влак «Эволюций» фонд акционер ушем деке ушнен, реорганизацийым эртат. «Ростех» акционер ушем шке декыже «Роствертол» фондым ушымо дене вашталтеш. «Эволюций НПФ» акционер ушем дене «Ростех НПФ» акционер- ушем- влак моло деч правам налше семын, шке клиентышт да ушымо фонд- влакын клиентышт ончылно налме обязательствым умбакыже шукташ тӱналыт. Фонд- влакым пужен ыштымылан кӧра, обязательный пенсий страхований шотышто ойпидышым уэш ышташ ок кӱл. Но страховатлалтше еҥ- влак ончыктымо «Эволюций», «Социал вияҥмаш», «Образование», «Согласие», «Ростех», «Роствертол» фондла гыч Россий пенсий фондыш але кугыжаныш огыл пенсий фондыш куснаш йодмашым возаш праван улыт. Тыгай йодмашым пуымеке, гражданинын пенсийлан погынышо оксаже вес ий гыч ойырен налме фондыш тичмаш куснышаш.