Чавайн бульварыште тенияк пушеҥге ден кушкылым шындат
Йошкар-Олаште олмыктымо Чавайн бульварыште тенияк пушеҥге ден кушкылым шындаш тӱҥалыт. Икымше декабрь марте тушто сиреньым, барбарисым, гортензийым, курилысе чайым, туям, ваштарым да молымат вераҥдат. Кумдыкым ужарташ кум миллион теҥге ойыралтеш. Тиде окса денак мландыжым ямдылышаш, газоным тӧрлышаш да моло сомылымат шуктышаш улыт. Ушештарена: оласе калыкын йӧратыме каныме вержым «Оласе йӧнан кумдык» федерал программе кышкарыште тӧрлат.
