Юл эҥерыште пассажир причал лийшаш
Козьмодемьянск воктене Юл эҥерыште пассажир причалым ышташ проект паша мучашыш лишемеш. Кызыт проект да смете документаций кугыжаныш экспертизым эрта. Келшыше заключенийым налмеке, чоҥашлан подрядчикым ойырен налме конкурс увертаралтеш. Тиде объект республикым социал-экономик велым вияҥдыме индивидуал программе почеш шыҥдаралтеш да оксам, тӱҥ шотышто, федерал бюджет ойыра. Причалым чоҥашлан 232 миллионат 400 тӱжем теҥге кӱлеш лиеш. Объектым чоҥымо нерген Республикым вуйлатыше Александр Евстифеевын эртарыме совещанийыште ойлымо. Юл эҥерыште причалым шушаш ийын чоҥаш тӱҥалаш да 2023-шо ийыште мучашлаш палемдыме. Причал пырдыжше деч посна пассажир- влаклан павильон лийшаш, тул волгыдым пуртыман да кундемым тӱзландарыман. Причал республикыште туризмым вияҥдаш манын ышталтеш. Кызыт республикыште капитально ыштыме причал уке. Улшыжо телылан кораҥдалтеш. У причал кеч-могай классан пассажир суднылан чарнаш келшыше лийшаш.