Ирсӧснам сонарлаш чарыме

                Марий Элыште сӧснан африкан чума чержылан кӧра ирсӧснам сонарлаш чарыме. Республикым вуйлатышын Указше дене келшышын Медведево районысо Краснооктябрьский посёлкышто, Советский районысо Голубой посёлкышто да Йошкар-Олаште карантиным увертарыме. Документ дене тыгак чер лекме вер, лӱдыкшӧ кумдыкым палемдыме. Тиде кундемлаште сонарлаш ок лий. Тиддеч посна чер лекме вер гыч шӱдӧ меҥге радиусышто эскерыме зоным пеҥгыдемдыме. Тушто ирсоснам кучаш ок лий. Карантин жапыште республике мучкоат ирсоснам тыглай да спорт шот денат  сонарлаш чарыме. Кайыкым, пушкыдо каваштан да кӱчан янлыкым, маскам кучаш разрешенийым налше сонарзе- влак лӱдыкшӧ зонышто карантин эртымешке сонарлаш чарнышаш улыт. Указ да лӱдыкшӧ, эскерыме зоным ончыктышо схема-карте дене пӱртӱс поянлык министерствын сайтыштыже палыме лияш лиеш.

Прошлые выпуски