У автовокзал ик тылзе гыч ямде лийшаш

                  Александр Евстифеев республикысе кугыжаныш автовокзал- влак сетьым пӧртылташ кӱштен. Тыгай порученийым Марий Элым вуйлатыше таче Йошкар-Олаште у автовокзалым чоҥымо площадкыште увертарен. У объект 15-ше ноябрьлан ямде лийшаш. Александр Евстифеев чоҥымо пашан кузе кайымыжым ончен. Кызыт чоҥышо- влак вокзалын кӱваржым велыкташ ямдылалтыт, пӧлем- влак кокласе пырдыжым ыштат. Тымарте график почеш озанлык, быт да йӱрвӱд канализацийым, пырдыж ден леведышым ыштыме, асфальтым шарыме, тул волгыдым пуртат, павильон- влакым келыштарат. Алекандр Евстифеевлан у автовокзал келшен. Транспорт министр Александр Герасименкон мутшо почеш, вокзал транспорт лӱдыкшыдымылык йодмаш дене келшен толеш. Калыкым шупшыктымо задачым тӱрыс шукташ полша,- каласен Александр Евстифеев. Транспорт министерстве республике мучко, райрӱдыла гыч тӱҥалын автовокзал- влакым уэш пӧртылташ тӱҥалшаш. Тыгай пример уло. Тиде пашам умбакыже шуйыман. Молан манаш гын, тудо калыкын илыш качествыже дене кылдалтын. У вокзалын зданийже ик пачашан, 860 квадрат метр кумдыкан. Тудын воктене лу перрон, 40 автобуслан шогымо вер, 26 изи машиналан вер лиеш. Шке машинам шогалташ вер шукырак кӱлеш лиеш гын, ола администраций дене йодыш виктаралтеш. Вокзал кӧргыштӧ вучымо зал, кум кассе, медпункт, ава ден йочан, водитель- влакын каныме пӧлемлашт, санузел, охрана пост, сумкам аралыме камера да молат лийыт.