Республикысе школ тоштерын эн сай выставкыже пале лийын

                 Республикысе школ тоштерын эн сай выставкыже пале лийын. Йошкар-Оласе Таисия Александрова лӱмеш 11-ше лицейысе тоштерын ончерже эн сай  лӱмым налын. Кугу Ачамланде сар жапысе шарнымашан дата да событийлан пӧлеклалтше эн сай ончер- влаклан Россий кӱкшытан конкурсым Москосо Сеҥымаш Тоштер иктешлен. Тунемше да нунын туныктышышыт «Изак-шоляк Шерстнёвмыт лӱмеш Боевой чап тоштер» экспозицийым ончыктеныт. Тушечын сар жапыште лицейын 60 выпускникшын подвигышт нерген пален налаш лиеш. Тушто 1941-ше ийысе класс журналым, самолёт макетым, аттестат ден тетрадь- влакым ужаш лиеш. Шарнымашым, сар гыч колтымо серышым да фотосӱретым чумырымо. Ынде школын командыже школ тоштер- влакын Россий кӱкшытан  икымше форумыштышт участвоватлаш тӱҥалеш. Тудыжо Поклон курыкышто Сеҥымаш Тоштерыште тений 20-шо ноябрьыште эрта. Усталык таҥасымашке элысе 85 регион гыч тӱжемат 181 команде ушнен. Шӱдӧ утла паша кӱкшӧ акым налын. Но положений почеш сеҥыше радамыш кажне регион гыч ик команде пурен.