Йошкар-Ола гыч пӧръеҥ «Порсын корно» раллиште сеҥышыш лектын

               Йошкар-Ола гыч пӧръеҥ «Порсын корно» раллиште сеҥышыш лектын. Землякна Александр Максимов квадроцикл классыште ралли-рейдын сеҥышыже лийын. Таҥасымашын визымше йыжыҥже Горно-Алтайск маршрут дене эртен. Корнын 132 меҥге кужыт ужашыштыже йошкаролинец ик шагатат 22 минут да 31 секунд жапым ончыктен. Тудо Польшо гыч Рафал Соникым ончылтен. Тудыжын лектышыже ик шагатат 25 минут да 54 секунд лийын. Пандемийлан кӧра Монголий кундемыш пуртен огытыл. Ралли-рейд Россий да Монголий мучко эртышаш, йот элыште шым йыжыҥ лийшаш да финиш Улан-Баторышто эртышаш ыле. Но тушто коронавирус да бубон чума шарлымылан кӧра, таҥасымашын Монголий ужашыжым эртарыме огыл.