Шыжым Йошкар-Оласе уремлашке 10 у троллейбус лекшаш
Шыжым Йошкар-Оласе уремлашке 10 у троллейбус лекшаш. Рӱдӧоласе муниципал погым виктарыше комитет троллейбусым налаш электрон аукционым увертарен. Тидын шотышто решенийым Республикым вуйлатышын тӱҥалтышыж почеш лукмо. Техзаданийын йодмыж почеш транспортышто пассажир- влаклан кондиционер, чарналтыш- влакым увертыше оборудований, инвалид коляскым пурташ да лукташ трап лийшаш. Кызыт «Троллейбус транспорт» муниципал предприятийын балансыштыже 146 троллейбус шотлалтеш. Тушечын колыжо тоштеммылан кӧра ок кучылталт. Ола администрацийын уверже почеш тынар транспортым ятыр ий дене налме огыл. 2018-ше ийыште Моско гыч 32 троллейбусым яра кондымо. Нуно у огытыл гынат, тӱҥ состав деч кок пачаш самырыкырак улыт, 2004-ше 2005-ше ийлаште лукталтыныт. Контракт почеш поставщик 10 троллейбусым икымше сентябрь марте конден шуктышаш. Транспортым финанс лизинг йӧн дене налыт да вич ий жапыште тӱлен шуктышаш улыт.