Республикыштына тылыште тыршыше кок ӱдырамашым Российын Президентше саламлен

                 Республикыштына тылыште тыршыше кок ӱдырамашым Российын Президентше саламлен. Анна Григорьева ден Мария Пучайкина тиде кечылаште кугу лӱмгечыштым палемденыт. Поро йӱла семын нунылан Кугыжанышым вуйлатыше деч лӱман саламлымаш толын. Волжский районысо Карай ялыште шочшо Анна Семёновна 30-шо июньышто 95 ийым темен. Тудо изи гычак шоло волтымаш гыч тӱҥалын, ӱшкыж дене пасум тырмален, вара ӱмыржӧ мучко Прохоров лӱмеш колхозышто шала пашам ыштен. Ныл икшывыже, 11 уныкаже да 13 кугезе уныкаже уло. Кызыт Йошкар-Олаште ила. Мария Михайловна Пучайкина Волжский районысо Чолемсола ялыште шочын. Кокымшо июльышто тудлан 90 ий шуын. Изи годсек колхозышто, сар жапыште пасуштат, шолым волтымаштат тыршен. Сар деч вара Пӧртанур ялысе колхозышто пашам ыштен да сулен налме канышыш лектын. Марийже дене кум икшывым куштеныт, кум уныкаже, кок кугезе уныкаже уло. Нуным саламлаш район администраций да социал полышым пуышо рӱдер гыч миеныт да Президентын саламлымашыжым, пӧлекым кучыктеныт.