«Мужаҥче» миллион утла теҥгелан поен

                    Йошкар-Ола гыч 44 ияш ӱдырамаш шоя экстрасенслан ик миллионат 100 тӱжем теҥге оксам пуэн. Июнь мучко тудо 8 гана оксам колтен да тукым каргымаш деч кораҥаш шонен. Рашемын: шукерте огыл ӱдырамаш Краснодар крайыште канен. Икана верысе телевидений дене экстрасенс нерген рекламым ужын да ончыктымо телефон дене йыҥгыртен. Тудлан оператор вашештен да шинчанужшо уэш йыҥгырта манын. Чынак икмыняр жап гыч рвезе йыҥгыртен, йодышт налын. Ӱдырамаш нимом шылтыде, йочамын тазалыкше шотышто проблема уло манын. Шинчан ужшо амалжым вигак рашемден: ӱдырамашын ешыжым тукым каргымаш орландара манын. Тудым кораҥдаш лиеш, но кӱлешан ӱзгар- влакым налман. Тыге ӱдырамаш тылзе наре оксам колтылын. 8 перевод дене ик миллионат 100 тӱжем теҥге каен. Аферистын эше 254 тӱжем теҥгем колташ йодмекыже гына ӱдырамашын ушыжо пурен да ондалкалымым умылен. Тыге полиций пӧлкаш йодмашым возен. Уголовный пашам тарватыме.