Шушаш ийын Марий Элыште тенийсе деч куд кумдыклан шукырак тӱзландарат
«Йӧнан оласе кумдыкым ыштымаш» федерал проект кышкарыште шушаш ийын Марий Элыште тенийсе деч куд кумдыклан шукырак тӱзландарат. Москошто паша дене улшыжла Марий Элым вуйлатыше Александр Евстифеев регионлам вияҥдыме шотышто Правительстве комиссий Президиумын заседанийыштыже лийын. Тудым Правительстве председательын алмаштышыже Марат Хуснуллин эртарен. Каҥашыме ик йодышыжо- «Йӧнан оласе кумдыкым ыштымаш» федерал проектым» шыҥдарымаш дене кылдалтын. Тудын кышкарыште тений Марий Элыште 85 кумдык тӱзаталтеш. Нунын кокла гыч 37-ше кудывече, 48-ыже- тӱшка кумдык. Чылаже шотыштат контрактым пеҥгыдемдыме, 30 кумдыкыштыжо пашам мучашлыме. Уло Российысе йӱклымаште шушаш ийлан 31 кумдыкым ойырен налме. А чылаже 91 кумдыкым тӱзландараш палемдыме. Ола да ял илемлаште чыла кумдык шотыштат дизайн-проектым ыштыме, кызыт проект-сметный документаций ямдылалтеш. Эн сай проектлан Российысе конкурсышто кок проект сеҥышыш лектын. Нуно Волжск да Козьмодемьянск олалаште шыҥдаралтыт.