Республикыштына ик суткаште вич чодыра пожар лийын
Республикыштына ик суткаште вич чодыра пожар лийын. Тул пижын кертме лӱдыкшӧ тургым тӱҥалме годсек республикысе чодыраште 35 гана тул пижын. Тудо тичмаш налмаште 109 гектарым авалтен. Тул пижмын тӱҥ амалже- айдемын титакше. Граждан оборона да йырым йырысе средам аралыме шотышто комитетын ончыктымыж почеш теҥгече лийше вич пожарыште 7 гектар чодыра йӱлен. Тул Курык марий районышто, Звенигово, Медведево районышто кок вере, Юрино районышто пижын. Чот шокшо шогымылан кӧра 5-ше июль марте пожар ваштареш шогымо посна режимым пуртымо, чодыраш кошташ чарыме. Чодыраште тул пижмым ужмеке, пӱртӱс поянлык министерствын диспетчер службышкыжо йыҥгырташ кӱлеш. Номерже: 56-65-35.