Республикыштына вӱдым ситарыме да йоктарен колтымо эше кок кугу объектым эксплуатацийыш налме

                      Республикыштына  вӱдым ситарыме да йоктарен колтымо эше кок кугу объектым эксплуатацийыш налме. Тиде «Медведево районысо Пӱкшерме- Шойбулак- Аэропорт- Пӱнчерсола-Пӱкшерме ялласе вӱдым ситарыме системым оҥгыш ушымаш» да «Звенигово оласе канализаций коллектор- влак да насос станций» объект- влакым мучашлыме нерген ойлалтеш. Нуным илышыш шыҥдарымаш республикысе илыме вер да коммунал озанлык аланыште Александр Евстифеевын шындыме задачым шуктымаште эше ик ӱшанле ошкыл лийын. Чоҥымаш, архитектура да илыме вер ден коммунал озанлык министр Михаил Степанов пашаче вашлиймаште Республикым вуйлатышылан увертарен: «Яндар вӱд» федерал проект почеш 18 мероприятийым шыҥдараш палемдыме. 2019-ше ийыште Килемарыште вӱд пучым чоҥымо, кодшо ийын Медведево районышто вӱд пучым ик оҥгыш ушымо паша тӱҥалын. Ынде тудым эксплуатацийыш налме. Пашан акше 60 миллион теҥгеш шуын, вич тӱжем утла еҥ чапле йӱшаш вӱдым налеш. 15 меҥге кужыт утла у пучым шупшмо але вашталтыме. Республикым вуйлатыше ушештарен: вӱд йӱаш гына огыл, пакчаш шавашат ситышаш.
            Звенигово олалан, поснак ЖКХ аланыште, 
правительстве кугу тӱткышым ойыра. Тушто вӱдым ситарыме да йоктарен колтымо йодыш дене нылымше ий пашам ыштена. Правительствын резерв фондшо гыч олан ныл бюджетше кугыт оксам ойырымо. Министрын мутшо почеш насос станцийыште паша кодшо ий годсек шукталтеш. Кызыт объектым эксплуатацийыш налме шотышто актеш кидым пыштыме. Пашан акше 60 миллион теҥгеш шуын. Объектым мучашлыме, качествыже сай,- мучашлен министр.