Ветеран- влак организацийлан полышым каҥашыме

                 Марий Элыште верысе сарлаште лийше ветеран- влак организацийлан полшымо мерым Правительствыште каҥашыме. Тушто мер организацийлам вуйлатыше- влак кучем органлан еҥышт дене вашлийыныт. Совещанийыште палемдыме: Правительствын боевой действийлан ветераныштын мер организацийышт дене вашкылым кучымашышт республикысе кучемын пашаштыже ик тӱҥ корнылан шотлалтеш. Кызыт Марий Элыште 740 коммерцийдыме организаций шотлалтеш. Тушечын 20-жо боевой действийлан ветеранже да инвалидше дене пашам ышта, самырык тукымым патриотизм шӱлышеш шуарыме йодышым виктара.
                 Правительство председательын алмаштышыже Ольга Фёдорован мутшо почеш вашкыл социал йодышым рашемдаш, ветеран- влакын илышыштым саемдымашке виктаралтшаш. Решатлыме пытартыш ик йодыш ветеран- влакын ешыштлан эмлыме верлаште медицина полышым пуымаш дене кылдалтын ыле. Тыге, сарын ветеранже- влакын госпитальыш эше ветеран- влакын ешышт гыч кок тӱжем утла еҥ толеш. Пашан эше ик корныжлан патриотизм шӱлышеш шуарымаш шотлалтеш.
                 Социал вияҥмаш министр Марина Островская палемден: кызыт республикыште боевой действийлан кандаш тӱжемат 621 ветеранже ила. Чылаштлан, закон дене келшышын, полыш пуалтеш. Тидлан бюджетыште 39 миллион теҥге оксам палемдыме. Тазалыкаралтыш министрын алмаштышыже Юлиана Зейтулаева ешарен: икымше июль гыч келгын шымлыме диспансеризаций тӱҥалеш. Тудо тыгак коронавирус дене черланен эмлалт лекше- влакым да нунын ешыштым авалта. Тушко ешартыш шымлымаш да тергымаш- влакым пуртымо. Тыгак вакцинаций йодышымат тарватыме. Прививкым туштак, сарын ветеранже- влакын госпитальыштышт ыштыкташ лиеш.

Прошлые выпуски