Россий чемпионатыште пенсионер- влак таҥасат

              Компьютер многоборье дене Россий кӱкшытан чемпионатыште ныл пенсионер Марий Элын чапшым арала. Пенсионер- влак коклаште 11-ше чемпионатын финалже теҥгече тӱҥалын. Тений ай-ти турнир сандалыклан пӧлеклалтын. Регионлаште сеҥышыш лекше 300 утла илалше еҥ коклаште  компьютер технологийым эн сайын палышыжым ойырат. Участник- влак электрон кугыжаныш полыш дене, кычалше системе дене пайдаланен моштымыштым, цифран гаджетым, мобильный приложенийым, интернетыште лийме лӱдыкшыдымылык правилым палымыштым ончыктат. Российысе пенсионер- влакын кибер таҥасымашыштышт Волжск гыч Надежла Саксонова, Курык марий район гыч Тамара Петрова, Оршанке гыч Николай Иванов, Йошкар-Ола гыч Шамиль Даминов кучедалыт.