Республике гыч икмыняр еҥ кӱкшӧ наградым налын

              Марий Эл Кугыжаныш Погын деч сенатор Сергей Мартынов Российысе Федераций Советым вуйлатыше Валентина Матвиенкон кӱштымыж почеш, Марий Элысе законодательный органын кок еҥжылан кӱшыл палатын наградыжым кучыктен. Кугыжаныш Погын вуйлатышын икымше алмаштышыже Владимир Мухин шуко ий тыршен пашам ыштымыжлан, парламентаризмым вияҥдымашке да республикысе законодательствым уэмдымашке пыштыме надырлан Федераций Советым вуйлатышын Тауштымашыже дене палемдалтын. А Кугыжаныш Погынын агропромышленный комплексым вияҥдыме, экологий да пӱртӱс дене пайдаланыме шотышто комитетын еҥже Владимир Кожановлан «Федераций Совет. 25 ий» лӱмгече медальым кучыктымо. 
             Марий Элым вуйлатыше кӱкшӧ наградым кучыктымо нерген Указеш кидпалыжым пыштен. «Сулло чоҥышо» Чап лӱмым Силикат кермыч заводын цехшым вуйлатыше Наиля Зарипова ден тӱҥ инженерже Сергей Садовый налыныт. «Марий Эл ончылно надырлан» кокымшо степенян орденым Марий Машиностроитель заводын тӱҥ инженерже Сергей Божколан пуымо.  Икымше степенян орден дене тиде заводын генеральный директоржо Борис Ефремов палемдалтын.