Марий Элыш кумыс дене эмлалташ толаш темлат
Марий Элыш кумыс дене эмлалташ толаш темлат. Республикына кумыс дене эмлыше 7 эн сай регион радамыш пурен. Канашлан илыме верым бронироватлыше сервис социал сетьла дене пайдаланыше- влак коклаште йодыштмашым эртарен: вӱльӧ шӧр дене тазалыкым пеҥгыдемаш кушко каяш темлат ыле? Рейтингыште ончыко Башкирий лектын. 41 процент турист тушко калыкле кухньым тамлаш, кумысым йӱаш, юртышто илен ончаш коштеш. Кокымшо верыште- Калмыкий. Тудым 28 процент ойырен налеш. Кумшо верым 17 процент дене Татарстан налын. Нылымше верым Марий Эл дене пырля Ульяновск область, Бурятий да Алтай край пайленыт.