Марий филармонийын у полатше августышто почылтшаш
Яков Эшпай лӱмеш филармонийым почмо жап вашталтын. Изи Какшан эҥер серыште нӧлтен шогалтыме у полатым почмо церемонийым август кыдаллан кусарыме. Тиде тӧнежым чоҥен шуктымо паша «Тӱвыра» калыкле проект кышкарыште шукталтеш. Тудын тичмаш акше 650 миллион утла теҥгеш шуын. Ондакырак тӱвыра министр Константин Иванов палемден ыле: тиде кугу сбытий лийшаш. Молан манаш гын, филармонийын тымарте шке пӧртшӧ лийын огыл. А ыштымеке, тиде тӱвыра храм лийшаш да икымше концерт икымше июльышто эртышаш ыле.