Марий Элым вуйлатыше республикысе пожар подразделений- влакым технически пойдараш шийвундым ойыраш кӱштен

                 Марий Элым вуйлатыше республикысе пожар подразделений- влакым технически пойдараш шийвундым ойыраш кӱштен. Пытартыш жапыште  илемлаште тул утларак пижмылан кӧра, Главан черетан совещанийыштыже калыкын лӱдыкшыдымылыкшо нерген йодыш нӧлталалтын да пожар ваштареш шогышо Кугыжаныш службо виктемым материально- технически пойдарыме нерген ойлымо. Правительство председательын алмаштышыже Степан Воронцовын мутшо почеш, пожар подразделенийлаште газодымозащитный службын укелыкше ятыр нелылыкым луктеш. Сандене Куяр посёлкысо да Волжск оласе кок подразделенийыште тыгай службым ышташ оксам ойыраш йодам,- каласен Степан Воронцов. Чылаже вич миллион теҥге окса кӱлеш лиеш. Республикым вуйлатыше тиде йодыш кӱлешан манын да йодышым виктарен колташ кӱштен. Степан Воронцов тидымат увертарен: пожар подразделений- влаклан спецтехникым, автопаркым 2016-шо ий годсек уэмдыме огыл. Тӱҥ техникым 84 процентлан ситарыме. Южыжо ынде 15 ий утла кучылталтеш. Тачысе кечылан 47 миллион утла теҥгелан вич пожар автоцистерным налаш кӱлеш. Республикым вуйлатышын мутшо почеш, иканаште огыл, а 2022-шо 2023-шо ийла мучко  машинам налаш тӱҥалына, визытым огыл, а кудытым уэмдена,- каласен вуйлатыше да калык денат чарныде профилактике пашам эртарен шогаш кӱлеш манын.