Республикысе шым район автоклубым налеш
Республикысе шым район «Тӱвыра» калыкле проект почеш автоклубым налеш. Шуко функциян тӱвыра рӱдерым але вес семынже автоклубым Волжский, Килемар, Куженер, Медведево, Оршанке, Параньга да Советский район- влаклан налаш 34 миллион теҥгем ойырымо. Кажне муниципал районлан ныл миллионат 727 тӱжем теҥге логалеш. Конкурс процедурым эртарыме, муниципал контарктым пеҥгыдемдыме. Конкурсым эртарыме почеш аныклен кодымо окса тиде тӱвыра тӧнеж- влакымак олмыкташ, автоклублан ешартыш оборудованийым налаш кучылталташ тӱҥалеш. Тидын нерген Республикым вуйлатыше Александр Евстифеевын тӱвыра дене кылдалтше регионысо проектлам шыҥдарымылан пӧлеклыме совещанийыште тӱвыра министр Константин Иванов ойлен. Министр рашемден: кок автоклубым Волжский да Параньга районлан налме. Кодшо вич автоклубшо сентябрь марте толшаш. Константин Иванов тидымат увертарен: «Тӱвыра кумдык» регионысо проект почеш кокымшо ий Марий филармоний чоҥалтеш. Тенийлан 376 миллион теҥге оксам ойырымо. Тачысе кечылан 88 процент шийвундым кучылтмо. Объект 93 процентлан ямде. Фасадым сӧрастарыме паша мучашлалтеш да объектым эксплуатацийыш налаш документ ямдылалтеш. Тыгак ялысе кум тӱвыра пӧртым капитально олмыкташ субсидийым ойырымо. Вечын селаште, Марий Солаште да Сотнурышто тӱвыра тӧнеж- влак уэмшаш улыт. Тиддеч посна Куженер, Морко, Советский да Юрино районлаште ныл йоча сымыктыш школым капитально олмыкташ оксам ойырымо. Пеҥгыдемдыме контракт почеш клуб- влакым икымше октябрь марте, кум сымыктыш школым 20-шо август марте, Советский посёлкысо школым икымше октябрь марте ыштен шукташ палемдыме. «Цифран тӱвыра» регионысо проектым шындарыме кышкарыште 2019-ше ийыштак виртуал концерт зал- влакым ышташ тӱҥалме. Тудым Козьмодемьянскыште ыштыме. Тений вич миллион утла теҥгем Эрик Сапаев лӱмеш театрыште виртуал концерт залым ышташ пуымо. Сергей Чавайн лӱмеш калыкле книгагудо «книга памятник» радамыш пурышо савыктыш- влакым цифран форматыш умбакыже кусара. Идалык еда 10 шергакан книга у форматыш кусна.